de letscht

das isch de letscht bitrag, weisch eifach so das no eine meh isch...

wie isch das ueberhaupt i de schwiiz, isch det i de letschte moenet au so e kranket usbroche, wo d'fueess infiziert, das nachher usgsehnd wie krokodil fueess, also da in kanada haet die kranket fascht jede zweit, hoffe schwaer das ich das i de schwiiz nuemme so vill muess gseh, isch eifach haesslich zum aluege....

und jetzt ganz zum schluss no das:
waenn du da en laeser gsi bisch, dich aber nanig miteme kommentar als laeser goutet haesch, das isch dini letscht chance.....

und s'zweite, falls der am maentig langwilig isch... 09.10 flughafe zueri flug vo frankfurt....

ottawa, irgend es provinzkaff in quebec, quebec city, montreal

ja das sind so mini statione gsi wo ich di letschte 2 wuche verbracht han.... huet isch aber de noed wo ich gsi bin, sondern under anderem mit waem...

Bernhard Oestrich troffe in Ottawa

Mit ihm han ganz e wichtigi lektion glernt, bstell niemals oepis imene indische restaurant wo mit HOT HOT HOT agschribe isch.... es isch naemlich wuerklich scharf... zwei pitcher haend daenn aber fuer di noetigi abchueelig gsorgt


Walther New Jersey troffe in Quebec City

Walther de Zauberer, er haet eus en ganze abig mit tricks underhalte, und waenn er noed grad am zaubere gsi isch, daenn haetter sini frau gsuecht... also ich han si nie gseh, bin mer immer nanig ganz sicher ob si ueberhaupt existiert


Kim Kalifornie troffe in Quebec City

Schafft ufeme Kruezfarhtschiff wo rund um Nordamerika tuckeret... meh weiss ich au noed, will haet eigentlich tagelang nur vo ihrem job verzellt....


En Irlaender troffe in Montreal

Kaenn plan meh, wie de gheisse haet, aber mit ihm bini uf jede fall am letschte fritig abgsoffe wie scho lang nuemme.... und es haet mer wuerklich leid ta, das ich am morge am 4 mis ganze zimmer gweckt han, mis handy haet aber hald wuerklich fascht kei akku meh gha, und drum han ich hald s'kabel muesse finde

e witeri wuche

bi mim letschte post bin ich in thunder bay gsi, han eigentlich nur welle ei nacht det blibe.... es sind daenn aber 4 drus worde. es paar gueti lueuet im backpackers vo de gial gsi. und au gial saelber isch e luschtigi aber durchus au komischi peron gsi. s'erschte wo si dir seit waenn du is hostel chunnsch isch ihres laebensmotto "There are two good things in life: hard drugs and masturbation". die dritt und viert nacht isch daenn fuer mich und en andere gratis gsi, will mir fuer 2 taeg das hostel gfuehrt haend, will gial in amerika gsi isch. de grund isch das si noed ume gsi isch, isch noed weniger komisch, aber ich mueest jetzt eifach z'wiit ushole, und irgendoepis muess ich daenn au no i de schwiiz bimene chueele weize z'verzelle ha...

vo thunder bay isches daenn witer gange uf sault ste marie, det isch definitiv nuet los gsi, und ussert amene spaziergang dur e sumpflandschaft isch au nuet wuerklich spektakulaer gsi.

huet morge bin ich daenn in ottawa acho, mal luege wies da wird, han ebe meh oder weniger de ganz tag gschlafe... so e nacht im bus isch hald scho noed wuerklich erholsam.

aber oepis chan ich scho saege, die naechschte naecht wird ich im gfaengnis verbringe. glaubsch noed, luegsch da: http://www.hihostels.ca/OntarioEast/en/index.aspx?sortcode=2.0

@baenztiger: de trick isch au mir in sinn cho, aber d'serviertochter haet oepisdegaege gha, defuer haets daenn aber 2 jaegermeister shots gratis ghae

@gibbe: abmachig isch abmachig, waenn d'sabine fertig isch, e chischte bier vo mir fuer eu, waenn noed, e chischte bier vo eu fuer mich

@johannes: logisch han ich e digicam, aber i de letschte taeg haets kei foeteli me ghae, han ebe s'ufladekabel verlore, a de leschte zwei ort, haets nuet ersatzmaessigs ghae, vilicht han ich ja in ottawa me glueck, isch ja schliesslich hauptstadt und noed so es provinzkaff.

faelder, chuee, wald

das isch oepe s'einzige wo ich i de letschte taeg gseh han, vill me haets zwuesched calgary und thunder bay da wo ich im momaent bin noed wuerklich. ok, winnipeg isch als einzigi groesseri stadt no de zwuesched, aber au di isch noed grad sehr spektakulaer.

suscht gfallts mer aber immer no guet da aenne, han scho jenes lueuet kaenne glernt und di letschte 5 taeg bin ich au zaemme miteme englaender underwaegs gsi. de isch daenn aber diraekt vo winnipeg uf ottawa, 30 stunde bus, das han ich mir eifach noed welle atue.

schwiiz - schwede
de kaenned er ja sicher, jede kanadier verwaechslet das die ganz ziit.... "schwiiz ja das kaenni, ihr haend ja ganz vill gueti hockey spiller i de nhl, zum bispil de peter forsberg..."
mini taktig um das missverstaendnis uf z'hebe:
bim erschte mal wird fruendlich druf higwise, dases schwiiz und noed schwede isch...
bim zweite mal wird namal fruendlich druf higwise, und abgmacht das jedi naechscht verwaechslig e zigarette choschtet...
isch bis jetzt eigentlich guet gange, nur s'problem isch, das ich jetzt daenn bald en eaxtra koffer nur fuer zigarette bruche...

schwiiz - alles guet
s'beschte wo ich i de letschte zwei wuche ueber d'schwiiz erfahre han... "i de schwiiz gits fascht kei kriminalitaet und die wenige wo im gfaengniss sind, doerfed jedes wucheaend hei." uebrigens das haet kaenn kanadier oder kaenn ami zu mir gseit, sondern en hollaender.

alberta - bier und zigi
ueberall in kanada isches verbote dine z'rauche, aber in alberta isches no es stuck haerter. mer doerf noed mal waenn mer imene restaurant verusse hockt eis rauche.
loesig: mer nimmt sis bier und ghat zwei meter naebed dra uf em trottoir eis go rauche
falsch: trottoir isch oeffentlich, und det isches wiederum noed erlaubt alkohol z'trinke
fazit: mer chan noed glichzitig rauche und es bier trinke, und ich han immer gmeint, das seg de einzig grund wieso de maensch zwei haend haet

und waenn ihr eu jetzt vilicht froeged, warum das ich so vill ziit han zum da schribe, ganz eifach ich bin da i de oeffentlich bibliothek, internet isch gratis, und es isch schoen klimatisiert, und verusse isches im momaent eifach z'heiss....

happy canada day

tschau vancouver

am maentigabig bin ich mitem bus vo vancouver quer dur d'rocky moutains uf edmonton gfahre. isch ja zum glueck noed so lang gange.... nur 17 stund.... so bin ich daenn also am zischtig mittag in edmonton acho, und daenn oepe 2 stund i de stadt umegirrt bis ich d'jugi gfunde han... mer soett sich hald d'adraesse neumeds notiere... naja mer lernt dezue.

am abig daenn mit es paar lueuet vo de jugi in usgang, edmonton rockt zwar noed so wie vancouver, isch defuer aber einiges guenstiger :-). und es isch herrlich de kanadier zue z'lose waenns ueber amerika flueched....

am mitwuch bin ich in edmonton s'groeschte shopping center vo de waelt go aluege... also es shoppingcenter mit em groeschte hallebad vo de waelt, kinos, casino, chilbi usw... so sache baut mer hald, waenn mer wie kanadier land zum versaue haet.

huet isches daenn witer gange uf calgary... nei nuemme 17 stund, sondern nur no chli meh als 3 stund, isch also eigentlich grad um de egge.

zum schluss no, alli wo uf e mail antwort warted, sorry, bin hald noed grad de schnaellscht zruggschrieber :-)

langwiligi 3 stunde

das isch jetzt mini letscht wuche in vancouver... vilicht froeged ihr eu also was langwilig chan si. Ganz eifach, letscht fritig bin ich go es football spiil luege, laeck du mir isch das en dumme sport, het also noed vill gfaehlt und ich waer igschlafe. und ebe, daenn ghat dass au no 3 stund!!!! s'eiduetige fazit: eimal und nie wieder!

s'wichtigste suscht vo dere wuche, chicken wings, capilano bridge und natuerlich letscht samstig abig... foetteli vo dem gits bim link vom letschte post... und ja han im casino 20 dollar gunne!!!!! nei, nei haet wuerklich kei spiilsuechtigi det ine

so, das waers fuer huet, maeld mich daenn wieder us edmonton oder calgary

hi munchkins

im huetige bitrag gits mal so e chlini zaemmefassig was ich so waered ere wuche mach

maentig morge: schlafe
maentig namitag: 1 stund schuel... daenn vilicht es bier... oder ich muess irgendwelchi problem loese, wie zum bispil kei gaeld me uf de kreditcharte.... zum glueck han ich jetzt e hoecheri limite :-)
maentig abig: normalerwis isch das de kino abig

zischtig morge: schuel
zischtig namitag: strand, park, bier, golf
zischtig abig: volleyball

mitwuch morge: schuel
mitwuch namitag: schuel
mitwuch abig: crush... party und saufen

dunstig morge: eigentlich schuel... aber isch hald meischtens noed moeglich nach em mitwuch abig
dunstig namitag: hmm, eigentlich glich wie de zischtig namitag
dunstig abig: hmm, eigentlich glich wie de mitwuch abig, nur amene andere ort

fritig morge: schlafe
fritig namitag: schuel
fritig abig: hmm, eigentlich glich wie de dunstig und de mitwuch abig...

ja, und s'wucheaend soett ja eigentlich klar si

ach ja, waenner mal chli fotis waend aluege.... http://picasaweb.google.de/LRogantini

sind zwar noed vo vor, aber glich guet...

make "G-Baer-field socks FCZ rocks" happy post

nei, es git kei schoeni kanadierine, alli sind wueescht und haend am ganze koerper roti ahornbleter!

paech gsi

und wieder...

... isches mittwuch, das isch eiduetig de duemmscht tag vo de wuche, wills ebe de einzig isch, wo ich de ganz tag schuel han...

am maentigabig bin ich is kino gange.... 28 weeks later, super film, jaja... aber am naechschte tag isch mer noed de schlaecht film uebel ufgstosse, sondern mini packig popcorn. nei es isch noed di groest portion gsi, sondern nur di mittleri (aber i de schwiiz waers di eaxtra gross familiepackig). De grund fuer min verstimmte mage isch gsi, das di ueber popcorn no literwiis fluessige butter tueend. isch daenn oepe so wie waenn mer eis maiskorn mit eim pack butter isst.

letscht dunstig isch au ganz glatt gsi, isch so e schueeler party gsi, sind lueuet vo allne sprachschuele in vancouver det gsi (wieder en obfaelder troffe), knapp d'helfti det sind schwitzer gsi. Aber ich bin de einzig vo Daenemark gsi, sauglatt, waenn d'schwitzer meined du verstahsch si noed. Und wo ich als Daen daenn es Florian Ast Lied kaennt han, sinds total zerstreut gsi....

so no e halb stund, daenn gits z'mittag... zwei stuck pizza fuer 3 franke

spoeoe wird sportlich

und jetzt mueend er noed daenke ich heg eifach es pub gfunde wos e dartschibe haet (han uebrigens no keis gfunde..) nei, nei ich meine richtige sport. geschter bin ich naemlich go bowling spille, isch aber noed wuerklich guet gsi, es isch eher extrem komisch gsi, es haet naemlich nur 5 kegel gha, und d'chugle isch oepe so gross gsi, wie en handball... zum glueck haets det aber au bier ghae....

ja, ok wuerklich en astraengende sport isch bowling au noed grad, aber mini sportlichi phase isch huet abig, also zischtigabig, witergange, ich bin naemlich zaemme mit em neffe vo minere gastfamilie go volleyball spille, noed schlaecht, oder?

huet han ich au no oepis ganz luschtigs gseh, a dere quartierstrass wo ich wohne (e quartierstrass wo so breit isch, wie bi eus e autobahn), haets ueberall baeum, und uf dene baeum gseht mer ab und zue es eichhoernli. und es haet au ueberall so grossi schwarzi rabe. huet han ich zuegluegt, wie so en fette raab es eichoernli ueber d]strass ghetzt haet, isch so e richtige verfolgigsjagd gsi, s'eichhoernli isch gsecklet, und de raab isch oepe 20cm ueber em eichhoernli gfloge.

handy nummere

nach einere wuche han ichs aendlich gschafft, mir e kanadische sim-charte z'chaufe
so, das isch mini nummere: +16047837290

han mich scho ganz guet iglaebt, isch au noed schwaer mit so villne schwitzer :-) han scho zwei vo affoltere und eine vo obfaelde kaenneglernt. natuerlich haets au kanadier (wo aber vill eher asiatisch usgsend) und die sind so was vo fruendlich, herrlich wie di schoen i einere reihe stoend zum in bus istige. huet simmer nach de schuel no in metrotown gsi, das isch es shopping center usserhalb vo de stadt, naja mir haend eus daenn chli verirrt, isch aber au logisch bi 470 laede...

am samstig gits daenn de erscht usflug, uf victoria, das isch e stadt uf vancouver island, und i zwei wuche ghats daenn fuer 4 taeg id rocky mountains

so, fertig fuer huet, will jetzt gits daenn z'nacht, zu 99% wirds riis ghae, und daenn ghats ab id stadt go hockey luege (Go Canucks Go).

p.s. sit zwei taeg isches wieder am raegne...

erste tag

so mini erschte 24 stund in kanada sind verbi... naja vill han ich nanig gmacht, oepe d'helfti vo dere ziit han ich au gschlafe. huet morge bin ich mit mim schwitzer mitbewohner (wo aber kei duetsch chan) id stadt. er haet mir zeigt wo d'schuel isch und daenn bin ich z'erscht mal go en schirm chaufe... will bis jetzt haets i dene 24 stund nur eimal graegnet. ab morn soetts waetter aber schoener waerde.... (falls eu de satz irgendwie an nico errineret, isches rein zuefellig)

mini family isch ganz in ornig, eigentlich isches meh es studaente wohnheim. de ganz under stock isch fuer eus, mit eignem bad eigener chuchi, eigenem fernseh und emene eigne alte computer wo ich mich jetzy grad demit abmueh.

ja, das waers mal fuers erschte, fotis gits leider no keini, will de computer so oepis wie usb noed kaennt.

abflug - adrässe - rückflug

abflug

dunstig, 26. april 09.10


adrässe

Marco Spörri
c/o Rao Suzy
7290 13th Street
V3N 2C8 Burnaby
Tel. +1 604 524 57 14

sobald ich eini han, gits dänn no e handy nummere


rückflug

Mäntig, 06. August 09.10

Welcome @ spööOnTour

ich sitze grad no mini letschte stunde im büro ab....

aber sobalds am nächschte dunstig losghat, wird ich da ine über mini reis brichte.